ಶವ ಮೆರವಣಿಗೆ ಮಾಡಲು ಗೊತ್ತಿದೆ - ಮಾಜಿ ಶಾಸಕ ರಘುಪತಿ ಭಟ್

ಉಡುಪಿ: ರೆಸಾರ್ಟ್ ಮಾಡಲೆಂದು ತಾಲೂಕಿನ ಬಡಾನಿಡಿಯೂರು ಗ್ರಾಮದ ಸರ್ವೇ ನಂಬರ್ 118/2ಎ1ಎ3 ಮತ್ತು 118/2ಬಿ ಯ 0.90 ಎಕರೆ ಜಾಗದ ಏಕವಿನ್ಯಾಸ ( ಸಿಂಗಲ್ ಲೇ-ಔಟ್) ಗೆ ಸಲ್ಲಿಸಿದ ಅರ್ಜಿಯನ್ನು ನಗರಾಭಿವೃದ್ದಿ ಪ್ರಾಧಿಕಾರವು 2 ವರ್ಷವಾದರೂ ಅನುಮತಿ ನೀಡದೇ ಇರುವುದನ್ನು ವಿರೋಧಿಸಿ ಮಾಜಿ ಶಾಸಕ ರಘುಪತಿ ಭಟ್ ಪ್ರಾಧಿಕಾರದ ಆವರಣದೊಳಗೆ ಸೋಮವಾರ ಧರಣಿ ಕುಳಿತಿದ್ದಾರೆ. ಈ ವೇಳೆ ಸ್ಥಳಕ್ಕೆ ಆಗಮಿಸಿದ ನಗರಾಭಿವೃದ್ಧಿ ಪ್ರಾಧಿಕಾರದ ಆಯುಕ್ತ ಮಹೇಶ್ ಆಗಮಿಸಿ, ಮಾಜಿ ಶಾಸಕ ರಘುಪತಿ ಭಟ್ ಅವರನ್ನು ವಿಶ್ವಾಸಕ್ಕೆ ಪಡೆಯಲು ಪ್ರಯತ್ನಿಸಿದರು. ಈ ವೇಳೆ ಮಾಜಿ ಶಾಸಕ ರಘುಪತಿ ಭಟ್ ಅವರು, ನಾನು ಸಾರ್ವಜನಿಕರ ಸಮಸ್ಯೆಗಳ ಪರಿಹಾರಕ್ಕಾಗಿ ಈ ಹಿಂದೆ ನಗರಸಭೆಯ ಕಮೀಷನರ್ ವಿರುದ್ದ ಶವಯಾತ್ರೆ ಮಾಡಿದ್ದೆ. ಈಗಲೂ ಅಂತಹ ಪ್ರತಿಭಟನೆ ಮಾಡಲು ತಿಳಿದಿದೆ ಎಂದು ಗದರಿಸಿದರು. ಹಿರಿಯ ಅಧಿಕಾರಿಗಳು, ಹೈಕೋರ್ಟಿನ ಆದೇಶಕ್ಕೂ ತಾವು ಬೆಲೆ ಕೊಟ್ಟಿಲ್ಲ, ನನಗೆ ಸಿಂಗಲ್ ಲೇ-ಔಟ್ ಕೊಡಿ ಅಥವಾ ಹಿಂಬರಹ ನೀಡಿ ಎಂದರು. ಇದಕ್ಕೆ ಪ್ರತಿಕ್ರಿಯಿಸಿದ ಅಧಿಕಾರಿ ಒಂದು ದಿನದ ಕಾಲವಕಾಶವನ್ನು ಕೇಳಿದರು. ಕಾಂಗ್ರೆಸ್ ಮುಖಂಡ ನಾಗೇಂದ್ರ ಪುತ್ರನ್, ಧಾರ್ಮಿಕ ಮುಖಂಡರಾದ ಮಹೇಶ್ ಠಾಕೂರ್, ಪ್ರಕಾಶ್ ಕುಕ್ಕೆಹಳ್ಳಿ, ಬಿಜೆಪಿ ಮುಖಂಡ ಸುವರ್ಧನ್ ನಾಯಕ್ ಮತ್ತಿತರರು ಉಪಸ್ಥಿತರಿದ್ದರು.